Sir 35

1 Соблюдаяй закон умножает приношения, приносит жертву спасения внимаяй заповедем. 2 Воздаяй благодать аки приносяй семидал, и творяй милостыню аки жряй жертву хваления. 3 Благоволение Господне еже отступити от лукавства, и очищение есть еже отступити от неправды. 4 Не явися пред Господем тощь: вся бо сия заповеди ради. 5 Приношение праведнаго утучняет олтарь, и благоухание его пред Вышним: 6 жертва мужа праведнаго приятна, и память ея не забвена будет. 7 Оком благим прослави Господа и не умали от начатка рук твоих: 8 во всяцем даянии весело имей лице твое и со веселием освяти десятину. 9 Даждь Вышнему по даянию Его, и оком благим приобретение руки: 10 яко Господь воздаяй есть и седмерицею воздаст ти. 11 Дара не умаляй, ибо не приимет, и не внимай жертве неправедней: 12 яко Господь судия есть, и несть у Него славы лица. 13 Не приимет лица на убога и молитву обидимаго услышит: 14 не презрит молитвы сираго, ни вдовицы, егда излиет прошение. 15 Не слезы ли вдовичи по ланитома текут, и вопль ея на наведшаго я? 16 Служай (Богу) во благоволении прият будет, и молитва его до облак дойдет: 17 молитва смиреннаго пройде облаки, и дондеже приближится, не утешится, 18 и не отступит, дондеже посетит Вышний, судит в правду и сотворит суд: 19 и Господь не замедлит, ниже имать долготерпети о них, дондеже сокрушит чресла немилостивых. 20 И языком воздаст месть, дондеже потребит множество досадителей и скиптры неправедных сокрушит: 21 дондеже воздаст человеку по деянием его, по делом человеческим и помышлением их: 22 дондеже разсудит судом люди Своя и возвеселит я милостию Своею. 23 Коль красна милость во время скорби его, якоже облацы дождевнии во время бездождия.